Main Menu

આંબરડી ખાતે ખેડૂત શિબિરમાં હાજરી આપતા મંત્રીશ્રી રૂપાલા

સાવરકુંડલા તાલુકાના આંબરડી ખાતે કેન્દ્રીય મંત્રીશ્રી પુરૂષોત્તમભાઈ રૂપાલા, જિલ્લાના પ્રભારી મંત્રીશ્રી ધર્મેન્દ્રસિંહ જાડેજા, સાંસદશ્રી નારણભાઇ કાછડીયા અને નાફસ્કોબના ચેરમેનશ્રી દિલીપભાઈ સંઘાણીની ખાસ ઉપસ્થિતિમાં ખેડૂત શિબિર તથા અભિવાદન કાર્યક્રમ યોજવામાં આવ્યો હતો. આ કાર્યક્રમમાં તમામ કાર્યકરોને સંબોધતા કેન્દ્રીય કૃષિ અને ખેડૂત કલ્યાણ રાજ્યમંત્રીશ્રી પુરૂષોત્તમભાઈ રૂપાલાએ જણાવ્યું હતું કે કૃષિ માત્ર વ્યવસાય જ નહિ પણ દેશની એક વિરાસત પણ છે અને આપણે એ વિરાસતની જાળવણી ધ્યાન આપીને કરવી જોઈએ. સરકારની ખેડૂતલક્ષી વિવિધ યોજનાઓ આજે ઘરે ઘરે પહોંચી છે અને એકેએક ખેડૂત સમૃદ્ધ બન્યો છે. આમ આજના ખેડૂત મિત્રોનું દેશના આર્થિક વિકાસમાં ખુબ જ મહત્વનું યોગદાન છે. આપણો ખેડૂત સમગ્ર દુનિયાભરમાં સૌથી વધુ મહેનતુ છે. રાજ્ય તેમજ કેન્દ્રની સરકાર દ્વારા સમુહખેતી માટે ઘણી યોજના કાર્યરત છે તો તમામ ખેડૂતોને આ યોજનાઓનો લાભ લઈને સમુહખેતી કરવા અનુરોધ કર્યો હતો. આજના જમાનામાં ઓર્ગેનિક ફૂડની માંગ દિવસે ને દિવસે વધી રહી છે એવામાં જો આજનો ખેડૂત ઓર્ગેનિક ખેતી કરવા પ્રેરાશે તો એ ખરા અર્થમાં પ્રગતિ કરી શકે છે.અમરેલી જિલ્લાના પ્રભારી મંત્રીશ્રી ધર્મેન્દ્રસિંહ જાડેજાએ આ પ્રસંગે જણાવ્યું હતું કે ખેતીની અવનવી આધુનિક પદ્ધતિઓ, ઉચ્ચતર બિયારણો, સફળ ખેતીના નવા સંશોધનો અને જુદા જુદા પ્રકારના ખેતીલક્ષી પ્રયોગોની માહિતી જિલ્લા અને તાલુકાના એકેએક ખેડૂત સુધી પહોંચે છે અને તેના થકી આપણા ખેડૂત મિત્રો સમૃદ્ધ બન્યા છે. સફળ ખેડૂત મિત્રોને આવી પદ્ધતિઓને વધુ માં વધુ લોકો સુધી પહોંચાડવા એમણે તાકીદ કરી હતી. સાંસદશ્રી નારણભાઇ કાછડીયાએ જણાવ્યું હતું કે આજે આપણા દેશના વડાપ્રધાનશ્રી નરેન્દ્રભાઈ મોદી આપણા પર્યાવરણ અને પાણીના પ્રશ્ન માટે ખુબ જ ચિંતિત છે. મંત્રીશ્રીએ તમામ કાર્યકરોને વધુમાં વધુ સંખ્યામાં વૃક્ષો વાવવા તેમજ તેની પૂરતી માવજત કરવા અપીલ કરી હતી. આગામી દિવસોમાં ગાંધીજીની 150મી જન્મજયંતિ ઉજવાશે ત્યારે એમના સ્વચ્છ ભારતના સ્વપ્નને આપણે સૌ સાથે મળીને સાકાર કરવાની દિશામાં કાર્ય કરવા અનુરોધ કર્યો હતો. આમ મંત્રીશ્રીએ પાણી, પર્યાવરણ, શિક્ષણ અને સ્વચ્છતા વિષે વિસ્તારમાં વાત કરી હતી.નાફસ્કોબના ચેરમેનશ્રી દિલીપભાઈ સંઘાણીએ જણાવ્યું હતું કે આપણા દેશના વડાપ્રધાન શ્રી નરેન્દ્રભાઈ મોદીએ ખેડૂતો અને પશુપાલકો માટે ખુબ સારી સારી યોજનાઓ અમલી બનાવી છે. આ દરેકનો લાભ આપણા અમરેલી જિલ્લાના તમામ ખેડૂતો સુધી પહોંચાડવા તમામ કાર્યકરોને અનુરોધ કર્યો હતો.
આ કાર્યક્રમમાં મહુવાના ધારાસભ્ય આર. સી. મકવાણા, મહેશભાઈ કસવાળા, પૂર્વ ધારાસભ્યશ્રી સર્વશ્રીઓ બાવકુભાઇ ઉંધાડ, વી. વી. વઘાસીયા, જિલ્લા ભાજપ પ્રમુખશ્રી હિરેન હિરપરા, જિલ્લા ભાજપ મહામંત્રીશ્રી કૌશિકભાઈ વેકરીયા, અગ્રણી સર્વશ્રી કમલેશ કાનાણી, મનીષભાઈ સંઘાણી તેમજ જિલ્લા/ તાલુકાઓના વિવિધ પદાધિકારીઓ અને બહોળી સંખ્યામાં ભાજપના કાર્યકરો ઉપસ્થિત રહ્યા હતા. આ ઉપરાંત જયસુખભાઈ કસવાળાએ મંત્રીશ્રીના હસ્તે માનધન કાર્ડ સ્વીકાર્યું હતું.






error: Content is protected !!