Main Menu

ધારીનાં ડાભાળીમાં સિંહે શ્રમીકને મોતને ઘાટ ઉતાર્યો :સિંહ પાંજરે પુરાયો

ડાભાળી,ગુજરાતના સૌરાષ્ટ્રમાં એશીયાટીક સિંહ નવલુ નજરાણુ છે. સૌરાષ્ટ્રના આભુષણરૂપ સિંહ સહિતના અનેક વન્ય પ્રાણીઓ ગીર જંગલ છોડી રેવન્યુ વિસ્તારમાં પરિભ્રમણ કરી અવાર નવાર માનવીઓ પર હિંસક હુમલાઓ કરી રહયા છે. જેમાં ખાસ કરીને દીપડાએ તાજેતરમાં જ બગસરા પંથકમાં ત્રણ વ્યક્તિઓને ફાડી ખાધા બાદ વન વિભાગની ગોળીએ ઠાર માર્યાના બનાવ બાદ ભાગ્યે જ હુમલો કરતા સિંહે વહેલી પરોઢે ડાભાળી(જીરા) ગામે સીમ વિસ્તારમાં પરપ્રાંતિય મજુર પર હુમલો કરી મોતને ઘાટ ઉતાર્યાના બનાવના પગલે અમરેલી જીલ્લા સહિત સૌરાષ્ટ્ર ભરમાં ખળભળાટ મચી ગયો છે.
પરપ્રાંતિય મજુરને મોતને ઘાટ ઉતારનાર હિંસક સિંહને વન વિભાગે ગનથી બેભાન બનાવી પાંજરે પુરી આજીવન કારાવાસ માટે ઝુ માં ખસેડેલ છે.
આ બનાવની પ્રાપ્ત વિગત અનુસાર ધારી તાલુકાના ડાભાળી(જીરા)ની સીમમાં રસીકભાઇ બાંભરોલીયાની વાડીમાં ખેતર ભાગવુ રાખેલ મજુર કાળુભાઇ મોતીભાઇ બીલવાલ (રહે.મધ્યપ્રદેશ) વહેલી સવારના 6 કલાક આસપાસ કુદરતી હાજતે ગયેલ ત્યારે અચાનક આવી ચડેલા સિંહે તેની ઉપર હુમલો કરી ગંભીર ઇજા સાથે અંદાજે 1 કિ.મી. સુધી ઢસડી લઇ જતા કાળુભાઇનું મોત થયુ હતુ દરમ્યાન આ ઘટનાની જાણ વાડી માલીકને થતા તેમણે ગામના સરપંચ ચંદ્રેશભાઇ ભાભલુભાઇ વાળાને જાણ કરતા તેઓએ તુરંત જ વન વિભાગને જાણ કરતા ફોરેસ્ટર જાડેજા તથા વન વિભાગના સ્ટાફે ઘટના સ્થળે દોડી આવી કાળુભાઇની માથે પંજો રાખી બેઠેલા સિંહને દુર ખસેડવા પ્રયાસો હાથ ધરી મહામહેનતે સિંહના કબ્જામાંથી મૃતદેહ છોડાવી અન્ય મારણ મુકીને સિંહને લલચાવતા ફરી સિંહ ત્યાં આવી ચડતા ગનથી બેભાન કરી સિંહને પાંજરે પુરી મૃતક કાળુભાઇની લાશને પીએમ માટે ધારી અને સિંહને પ્રાણી સંગ્રહાલય જુનાગઢ મોકલી આપેલ. સૌરાષ્ટ્રમાં ભાગ્યે જ સિંહ માનવ પર હુમલો કરતો હોય આજે હિંસક બનેલા સિંહે સીમ વિસ્તારમાં શ્રમીકને મોતને ઘાટ ઉતારતા વન વિભાગમાં પણ નવાઇ ફેલાઇ છે. સાથો સાથ સીમ વિસ્તારમાં પણ ફફડાટ ફેલાયો છે.
આ ઘટનાની જાણ વાયુવેગે પ્રસરી જતા ગ્રામજનો અને ફોરેસ્ટ અધિકારીઓ ધારાસભ્ય, તાલુકા પંચાયત પ્રમુખ, મીડીયાના પત્રકારો ઘટના સ્થળે દોડી આવ્યા હતા. આ બનાવના પગલે ગ્રામજનોમાં ફફડાટ ફેલાયો હતો બીજી તરફ વન વિભાગે તાત્કાલીક પગલા લઇ સિંહને પાંજરે પુરતા હાશકારો પણ અનુભવ્યો હતો.






error: Content is protected !!