Main Menu

અમરેલી શહેર અને જિલ્‍લામાં વરસાદ પડવાના કારણે જગતાતમાં ખુશી વ્‍યાપી

અમરેલી,અમરેલી શહેર અને જિલ્‍લામાં છેલ્‍લા બે-ત્રણ દિવસથી સખત ઉકળાટ અને ગરમી વધતાં ધૂપછાવ ભર્યુ વાતાવરણ રહયું હતું. આજે અમરેલી શહેર અને જિલ્‍લામાં બપોર બાદ એકાએક વાતાવરણમાં પલટો આવતાં વિજળીના કડાકા-ભડાકા અને મેઘગર્જના સાથે ભાદરવામાં અષાઢી માહોલ સર્જાયો હતો. અમરેલી શહેરમાં પઃ00 વાગ્‍યા બાદ વિજળીના કડાકા-ભડાકા સાથે વરસાદ શરૂ થયો હતો. અને એકાદ કલાકમાં એકાદ ઇંચ જેવો વરસાદ પડયો હતો. અમરેલી શહેરમાં જોરદાર વિજળીના કડાકાઓ થતાં જુદી-જુદી જગ્‍યાએ વિજળી પડવાના બનાવોબન્‍યા છે. ચલાલા શહેરમાં વિજળીના કડાકા-ભડાકા સાથે હળવા ઝાપટા પડયાં હતાં ડેડાણના ત્રાકુડા, માલકનેસ, વાંગધ્રા, જામકા સહિતના ગ્રામ્‍ય વિસ્‍તારોમાં ધોધમાર વરસાદ પડી જવાના કારણે ખેતરો બહાર પાણી વહેતા થયાં હતાં. અમરેલી તાલુકાના સરંભડા, મેડી, તરવડા, બાબાપુર, ભંડારીયા સહિત ગ્રામ્‍ય વિસ્‍તારોમાં મેઘગર્જના સાથે એક ઇંચ વરસાદ પડયો હતો. લીલીયા તાલુકાના હાથીગઢ, બોડીયા, ભેસાણ, સાજણટીંબા, હરીપર, ઢાંગલા, ખારા, કુતાણા સહિત ગ્રામ્‍ય વિસ્‍તારોમાં વિજળીના કડાકા-ભડાકા સાથે દોઢ ઇંચ વરસાદ પડી જતાં ખેતીપાકને ફાયદો થશે. કુંકાવાવ, નાની કુંકાવાવ, નવા ઉજળા, જંગર, કોલડા, નાજાપુર સહિત ગ્રામ્‍ય વિસ્‍તારોમાં ગાજ-વીજ સાથે ધોધમાર દોઢ ઇંચ જેવો વરસાદ પડયો હતો. બગસરા અને રાજુલામાં હળવા ભારે ઝાપટાઓ પડયાં હતાં. ધારીના ખીચા, દેવળા, ડાભાળી, જીરા, દુધાળા, સરસીયા, દલખાણીયા, આંબરડી સહિત ગ્રામ્‍ય વિસ્‍તારોમાં ધોધમાર વરસાદ પડયો હતો. તેમજ દલખાણીયા, સરસીયા અને ગીરપંથકમાં ધોધમાર વરસાદના કારણે શેત્રુંજી નદીમાં હળવું પુર આવ્‍યું હતું. લીલીયાના પુંજાપાદર, લીલીયા, આંબા, પીપળવા, સનાળીયા, અંટાળીયા, લાલાવદર, સલડી જેવા ગ્રામ્‍ય વિસ્‍તારોમાં ગાજ-વીજ સાથે એક ઇંચ વરસાદ પડી જતાંખેડૂતોમાં આનંદની લાગણી વ્‍યાપી છે. ખાંભા, ઇંગોરાળા, ભાડ, વાંકીયા, ખડાધાર, નાનુડી, દાઢીયાળી, બગોયા સહિત ગ્રામ્‍ય વિસ્‍તારોમાં પણ વિજળીના કડાકા-ભડાકા સાથે અડધો ઇંચ જેવો વરસાદ પડયો હતો. લાઠી, સાવરકુંડલા વિસ્‍તારમાં પણ હળવા ભારે વરસાદ પડયાના વાવડ મળી રહયા છે. બગસરા તાલુકાના ખારી, હડાળા, ચારણ પીપળી, ખીજડીયા, કેરાળા સહિતમાં હળવો વરસાદ પડતાં વાતાવરણમાં ઠંડક પ્રસરી હતી અને વરસાદના કારણે વિજળી ગુલ થઇ ગઇ હતી. ચારણ પીપળીમાં અગાસી ઉપર વિજળી પડતાં સોલારને નુકશાન થયેલ અને અગાસીમાં ખાડા પડી ગયાનું જાણવા મળેલ છે.