Main Menu

એકવર્ષમાં ટ્રાફિક નિયમન ભંગના 24 હજાર કેસ કરતી જિલ્લા ટ્રાફિક શાખા

અમરેલી,
એસ.પી.શ્રી જગદીશ પટેલની સુચના અને માર્ગદર્શન હેઠળ અમરેલી જિલ્લા ટ્રાફિક શાખાના ઇન્‍ચાર્જ પી.એસ.આઇ.શ્રી ખીમજીભાઇ મકવાણા તથા સ્‍ટાફના એ.એસ.આઇ. શ્રી હર્ષદભાઇ જાની, શ્રી શૈલેષભાઇ અમરેલીયા તથા ડ્રાઇવર શ્રી મહેન્‍દ્રભાઇ ભુવા સહિતના સ્‍ટાફે જિલ્લાભરમાં ટ્રાફિક જાગૃતિ માટે વર્ષભર માર્ગદર્શન અને જરૂર પડયે ત્‍યાં ટ્રાફિક નિયમનના ભંગ સામે લાલ આંખ કરી વર્ષભરમાં સ્‍થળ ઉપર 23682 વાહનચાલકો પાસેથી ટ્રાફિક નિયમનના ભંગ બદલ સ્‍થળ ઉપર રૂા.2437300/-નો દંડ વસુલ્‍યો હતો. આ ઉપરાંત ગંભીર પ્રકારની ક્ષતિવાળા 326 વાહનો ડિટેઇન કરી આર.ટી.ઓ.મારફતે રૂપિયા 890310 નો દંડ વસુલ કરાયો હતો. જયારે એસ.ટી.ના ઉતારૂઓને લઇ જતા અને પ્રતિબંધિત વિસ્‍તારમાં વાહનો રાખવા બદલ 14 વાહનચાલકો સામે આઇપીસી 188 પ્રમાણે જાહેરનામાના ભંગ બદલ જે તે પોલીસ મથકમાં ગુના દાખલ કર્યા હતાં.
સ્‍થળ ઉપર દંડના કેસમાં સીટબેલ્‍ટ,ફોરવ્‍હીલ વાહનોમાં કાળાકાચ, રીફલેકટર, હેલ્‍મેટ, સ્‍કુલવાનમાં નિયમોનો ભંગ, લાયસન્‍સ વગર વાહનો ચલાવવા, ચાલુ વાહને મોબાઇલનો ઉપયોગ અને ગેરકાયદેસર રીતે ઉતારૂઓની હેરાફેરી બદલ કડક પગલા લેવાયા હતાં.
જિલ્લા ટ્રાફિક પોલીસ દ્વારા શિક્ષાત્‍મક કાર્યવાહી ઉપરાંત લોકોમાં ટ્રાફિક માટે જાગૃતિ આવે તેના માટે શાળાઓમાં જઇ માર્ગદર્શન આપવાના કાર્યક્નમો પણ યોજાયા હતાં જેનાથી જયારે વિદ્યાર્થી પુખ્‍ત થઇ વાહન ચલાવે ત્‍યારે ટ્રાફિક નિયમન ભંગના બનાવો ઓછા બને. તા.07 ને રવિવારે જિલ્લા ટ્રાફિક શાખા દ્વારા ખાંભા તાલુકાના ટુવ્‍હીલર, થ્રીવ્‍હીલર, ફોરવ્‍હીલર, લકઝરી, મીનીબસ, મેટાડોર અને હેવીવાહનચાલકો માટે ટ્રાફિકની જાગૃતિ લાવવા કેમ્‍પ રાખવામાં આવ્‍યો હતો જેમાં વાહનચાલકોને અકસ્‍માત નિવારવા માટે માર્ગદર્શન આપી ઉતારૂઓને ખુલ્‍લા વાહનમાં અને ભારવાહનમાં મુસાફરી કરવા ન દેવી. વાહનના કાગળો વિમાપોલીસી, પીયુષી, લાયસન્‍સ સાથે રાખવા જેવા પ્રાથમિક નિયમોનું પાલન કરવું અને ખાસ કરીને ખાંભા તાલુકામાં છેલ્‍લા બે માસમાં થયેલા અકસ્‍માતના વધારે બનાવોને ઘ્‍યાને લઇ માર્ગદર્શન આપી ટ્રાફિકને લગતી પત્રિકાઓ વહેંચી જાગૃતિ માટેના પ્રયાસો કરાયા હતાં.
આ ઉપરાંત જિલ્લા ટ્રાફિક શાખા દ્વારા જિલ્લાભરના વાહન ચાલકોનેજણાવવામાં આવ્‍યું છે કે, એચ.એસ.આર.પી.(હાઇ સીકયુરીટી રજીસ્‍ટ્રેશન પ્‍લેટ) નંબર પ્‍લેટ ફરજીયાત થઇ ગઇ હોય તાત્‍કાલિક ધોરણે હોય તો આર.ટી.ઓ.કચેરી અમરેલી તેમજ માન્‍ય ઓથોરાઇઝડ ડિલર પાસેથી નંબર પ્‍લેટ મેળવી લગાવી દેવી અન્‍યથા સરકારશ્રીના નિયમ મુજબ દંડની કાર્યવાહી કરવામાં આવશે. આ માટે વાહન ચાલકોને સાત દિવસનો સમય આપવામાં આવ્‍યો છે.