Main Menu

જીલ્‍લામાં હળવા ભારે ઝાપટાથી ધોધમાર ચાર ઈંચ જેવો વરસાદ

અમરેલી,
અમરેલી જીલ્‍લાના લોર અને નિંગાળામાં ધોધમાર દોઢ ઈંચવરસાદ પડી જવાના કારણે ધાતલ નદીમાં બીજી વખત પુર આવ્‍યુ હતુ. અને સારા વરસાદના કારણે ખેડુતોમાં ખુશી લાગણી વ્‍યાપી છે. જયારે સાવરકુંડલામાં પણ આજે બપોરના ધોધમાર દોઢ ઈંચ જેવો વરસાદ પડયો હતો. તેમજ રાજુલા શહેરમાં સાડા ચાર ઈંચ જેવો વરસાદ પડયો છે. વીજળીના કડાકા ભડાકા સાથે બારે મેઘ ખાંગા થતા શહેરના નીચાણવાળા કલેકટર સામેનો રોડ, છતડીયા રોડ, નીચલી બજાર, રેન્‍બો સોસાયટી જેવા સ્‍થળોએ પાણી ભરાયા હતા અને ભારે વરસાદ કારણે વીજળી ગુલ ગઈ હતી. જેના કારણે લોકોને હાલાકીનો સામનો કરવો પડયો હતો. રાજુલા નજીક ટીંબીમાં અને નાગેશ્રીમાં સારો વરસાદ હોવાનું જયદેવ વરૂની યાદીમાં જણાવાયુ છે. મોટા ભંડારીયામાં ધોધમાર ત્રણ ઈંચ વરસાદ પડતા નદીનાળા છલકાયા હતા. નાગ્રધામાં ધોધમાર દોઢ ઈંચ વરસાદ પડયાનું મધુભાઈ ભડીંગજીએ જણાવેલ છે. જયારે બરવાળા બાવીશીમાં આજે સાડા ત્રણ ઈંચ ધોધમાર વરસાદ પડયાનું દેવકુભાઈ કનાળાએ જણાવ્‍યું છે. જયારે ગઈકાલે લીલીયાના હાથીગઢમાં સાજે 5 થી 7.30 કલાકે દરમિયાન ધોધમાર બે થી અઢી ઈંચ પડી જતા વાવેતરને મોટો ફાયદો થયેલ છે અને સારા વરસાદને કારણે ગામનું તળાવ ઓવર ફલો થઈ જવાથી ખેડુતોમાં ખુશીની લાગણી વ્‍યાપી છે. જયારે નજીકનારંગપુર વડેરામાં બે થી અઢી ઈંચ વરસાદ પડી જવાથી તળાવમાં નવા નીર આવ્‍યા છે. જયારે ગઈકાલે ટોડા વરસડા વચ્‍ચે સારો વરસાદ પડયાના વાવડ મળી રહ્યા છે. મોટી કુંકાવાવમાં કિર્તીકુમાર જોષીના જણાવ્‍યા મુજબ આજે સાંજે 5.45 વાગે સખત ઉકળાટ બાદ એક કલાકમાં ધોધમાર બે ઈંચ વરસાદ પડી જતા ખેડુતોમાં હર્ષની હેલી ફેલાઈ હતી. કારણ કે કુંકાવાવ વિસ્‍તારમાં બે વખત બીયારણ નિષ્‍ફળ ગયું હતું. અને જો વરસાદ ખેંચાઈ તો અતિ વિકટ પરિસ્‍થિતી સર્જાય તેમ હતી. તેવા સમયે સારો વરસાદ થવાથી વાવેતરને મોટો ફાયદો થયેલ છે. અને ધોધમાર વરસાદને કારણે નીચાણ વિસ્‍તારોમાં ભરાયા હતા અને નદીઓમાં ધીમે-ધીમે પાણીની આવક શરૂ થઈ છે. અને હવે જો કુદરત વધારે મહેરબાન થાય તો પાણીનો પ્રશ્‍ન ઉકલે તેમ લોકો ઈચ્‍છી રહ્યા છે. સાવરકુંડલા શહેરમાં આજે બપોરના 2 થી 4 વચ્‍ચે ધોધમાર દોઢ ઈંચ વરસાદ પડી જતા વેપારી અને ખેડુત વર્ગમાં વધુ વરસાદ પડે તેવી આશા બંધાઈ છે. સાવરકુંડલા તાલુકાના વંડા, પીઠવડી, ગાધકડા, કાના તળાવ, ધજડી, ઓળીયા જેવા ગામો પણ વરસાદ પડયાના વાવડ મળી રહ્યા છે. અમરેલી તાલુકાના બાબપુર, ભંડારીયા, પાણીયા તેમજ બગસરાના ટીંબલા શિલાળામાં ધોધમાર વરસાદ પડયાના વાવડ મળી રહ્યા છે. સારા વરસાદનાકારણે સાતલી નદીમાં પુર આવેલ છે. જુના વાઘણીયામા આજે બપોર બાદ એક ઈંચ જેવો વરસાદ પડી જતા મોલાતને જીવતદાન મળ્‍યુ છે અને ખેડુતોમાં ખુશી વ્‍યાપી હતી.