લોકસભા સામાન્ય ચૂંટણી-૨૦૨૪માં નાગરિકો મહત્તમ મતદાન કરે તે માટે અમરેલી જિલ્લા વહીવટી તંત્ર દ્વારા મતદારોને જાગૃત કરવાની વિવિધ પ્રવૃત્તિ શરુ છે. સિસ્ટેમેટીક વોટર્સ એજ્યુકેશન એન્ડ ઈલેક્ટોરલ પાર્ટીસિપેશન (SVEEP) અને ટર્ન આઉટ ઈમ્પલિમેન્ટેશન પ્લાન (TIP) અંતર્ગત જિલ્લામાં વિવિધ કાર્યક્રમોનું આયોજન થયું હતું. નાગરિકો પોતે પણ મતદાન કરે અને અન્યને પણ લોકશાહીના આ પર્વમાં સહભાગી થવા પ્રેરણા આપે એવી અપીલ કરવામાં આવી હતી. લોકસભા સામાન્ય ચૂંટણી સંદર્ભે રાજ્ય ચૂંટણી આયોગ દ્વારા ગુજરાત રાજ્યમાં વધુ મતદાન થાય તે માટે મતદાન જાગૃતિ અંગે વિવિધ પ્રકારની મતદાન જાગૃતિ પ્રવૃત્તિઓના આયોજન કરવા સૂચના આપવામાં આવી છે.
તા.૪ મે, ૨૦૨૪ને શનિવારના રોજ સવારે ૮.૩૦ વાગ્યે ખાંભા તાલુકા મામલતદાર કચેરી ખાતે રન ફોર વોટ કાર્યક્રમ યોજાશે. રન ફોર વોટ અન્વયે ચૂંટણી ફરજ પરના અધિકારીશ્રી-કર્મચારીશ્રીઓ ખાંભા તાલુકા મામલતદાર કચેરીથી ગાંધી ચોક સહિતના વિસ્તારોમાં ફરી નાગરિકોને મતદાન માટે જાગૃત્ત કરશે.
તા.૪ મે, ૨૦૨૪ને શનિવારના રોજ સાંજે ૫ વાગ્યે રાજુલા તાલુકા પંચાયત કચેરીથી રન ફોર વોટ કાર્યક્રમ યોજાશે. તાલુકા પંચાયતથી આંબેડકર સર્કલ, આઇસીઆઇસીઆઇ બેંક, જલારામ મંદિર, આહિર સમાજ ગેટ અને રાજુલા પ્રાંત કચેરી સુધી યોજાનાર રન ફોર વોટ કાર્યક્રમમાં રાજુલાના નાગરિકોને મતદાન માટે અનુરોધ કરવામાં આવશે.
સાવરકુંડલા ખાતે રન ફોર વોટ કાર્યક્રમ યોજાશે. આ કાર્યક્રમના આયોજન અર્થે સાવરકુંડલા-લીલીયા પ્રાંત અધિકારીશ્રીના અધ્યક્ષ સ્થાને બેઠક યોજાઇ હતી. બેઠકમાં તાલુકા સંકલનના અધિકારીશ્રીઓ અને કર્મચારીશ્રીઓ ઉપસ્થિત રહ્યા હતા. તા.૪ મે, ૨૦૨૪ને શનિવારના રોજ સવારે ૮ વાગ્યે સાવરકુંડલા નગરપાલિકાથી રન ફોર વોટનું પ્રસ્થાન થશે. રન ફોર વોટ એ રિદ્ધિ સિદ્ધિ ચોક, મણિભાઈ ચોક, શેઠ શેરી, ગાંધી ચોક, મુખ્ય બજાર થઈ રિદ્ધિ સિદ્ધિ ચોકમાં વિરામ લેશે. મતદાન માટે મતદાતાઓને જાગૃત્ત કરવા વિવિધ સ્લોગન પણ સાથે રાખવામાં આવશે.
જિલ્લાભરના નાગરિકોને મતદાન માટે જાગૃત્ત કરવા SVEEP અને TIP અંતર્ગત અનેકવિધ કાર્યક્રમોનું આયોજન કરવામાં આવ્યું છે. વિવિધ કચેરીઓના અધિકારીશ્રી-કર્મચારીશ્રીઓ દ્વારા SVEEP અને TIP-રન ફોર વોટ કાર્યક્રમમાં જોડાઇને, નાગરિકોને અચૂક મતદાન માટે અપીલ કરવામાં આવી રહી છે.
